მომხმარებელთა უფლებების დაცვის საერთაშორისო დღესთან დაკავშირებით საქართველოს ენერგეტიკისა და წყალმომარაგების მარეგულირებელ ეროვნულ კომისიაში ღია კარის დღე გაიმართა, რომლის ფარგლებშიც კომისიის თავმჯდომარე დავით ნარმანია მოქალაქეებს შეხვდა. თავმჯდომარესთან ერთად შეხვედრას ესწრებოდნენკომისიის წევრები, მომხმარებელთა საჩივრების დეპარტამენტის დირექტორი, რეგულირების განვითარებისა და მეთოდოლოგიური დეპარტამენტის დირექტორი და  ენერგოომბუდსმენი.  

დავით ნარმანიამ მოქალაქეებს განუმარტა ენერგეტიკისა და წყალმომარაგების სექტორებში მომხმარებელთა უფლებების შესახებ და მოუწოდა, რომ კომუნალური მომსახურების კომპანიების მხრიდან მათი უფლებების დარღვევის შემთხვევაში, ყოველთვის მომართონ მარეგულირებელ კომისიას ან ენერგოომბუდსმენის სამსახურს.

„მარეგულირებელი კომისიის გადაწყვეტილებები და საქმიანობა ცხადყოფს, რომ ჩვენთვის უაღრესად მნიშვნელოვანია მომხმარებელთა უფლებები სრულყოფილად იყოს დაცული. ბოლო თვეების განმავლობაში განსაკუთრებულ პრობლემას წარმოადგენდა მოხმარებული ელექტროენერგიის დარიცხვები და იცით, რომ მოქალაქეთა მომართვების საფუძველზე, კომისიამ ადგილზე შეამოწმა კომპანიების საქმიანობები. გარდა იმისა, რომ დარღვევების დაფიქსირების გამო დაჯარიმდა სს „თელასი“, მოქალაქეებს ჯამში ნახევარი მილიონი ლარის დარიცხვა დაუკორექტირდათ, ხოლო მათ, ვისაც დარიცხვა უკვე გადახდილი ჰქონდა, ზედმეტობით  გადახდილი თანხა უკან დაუბრუნდათ სააბონენტო ბარათებზე.

ჩვენი მიზანია, რომ კომუნალურ სეგმენტში მომსახურების ხარისხი გაუთანაბრდეს ევროპულ სტანდარტებს და ადგილი აღარ ჰქონდეს კომპანიების მიერ გადაცდომებს. მოქალაქეებს კიდევ ერთხელ შევახსენებ, რომ ჩვენ ღია ვართ ნებისმიერი კონსულტაციისთვის. მარეგულირებელ კომისიასთან ან ენერგოომბუდსმენთან დაკავშირება შეგიძლიათ როგორც ქოლ ცენტრის საშუალებით, ნომერზე - 16 216, რომელზეც ზარის განხორციელება უფასოა მოქალაქეებისთვის, ასევე სოციალურ ქსელითაც“,  - განაცხადა დავით ნარმანიამ.

საქართველოს ენერგეტიკისა და წყალმომარაგების მარეგულირებელი ეროვნული კომისია მომხმარებელთა უფლებების დაცვის საერთაშორისო დღეს ყოველწლიურად სხვადასხვა ღონისძიებებით აღნიშნავს, რომელიც ენერგეტიკისა და წყალმომარაგების სექტორებში მომხმარებელთა უფლებების დაცვას უკავშირდება.