თანამშრომლობის პროგრამის არსი

თანამშრომლობის პროგრამა არის, კონკურენციის შემზღუდველი ხელშეკრულების დადების, გადაწყვეტილების მიღების ან შეთანხმებული ქმედების განხორციელების შემთხვევაში, დამრღვევის ჯარიმის დაკისრებისგან სრულად ან ნაწილობრივ გათავისუფლების სპეციალური წესი.

თანამშრომლობის პროგრამა ასევე ვრცელდება ბაზარზე მანიპულაციის და ბაზარზე მანიპულაციის მცდელობისას შესაბამისი პირების კოორდინირებულ ქმედებებზე.

რა პირობების დაკმაყოფილებაა საჭირო თანამშრომლობის პროგრამით სარგებლობისთვის?

თანამშროლობის პროგრამით სარგებლობისთვის აუცილებელია საწარმომ:

ა) წერილობით აღიაროს შესაბამის ქმედებაში მონაწილეობა;

ბ) კომისიას წერილობით წარუდგინოს ქმედებასთან დაკავშირებით არსებული ყველა მნიშვნელოვანი ინფორმაცია და მტკიცებულება, მანამ, სანამ ეს ინფორმაცია კომისიისთვის სხვა წყაროდან გახდება ცნობილი;

გ) უწყვეტად და შეუზღუდავად ითანამშრომლოს კომისიასთან საკითხის შესწავლის პროცესში;

დ) შეწყვეტოს კანონსაწინააღმდეგო ქმედებაში მონაწილეობა, გარდა იმ შემთხვევისა, როდესაც კომისია მიიჩნევს, რომ პირის მიერ შეთანხმებაში მონაწილეობის გაგრძელება განცხადებაში დასმული საკითხების შესწავლას ხელს შეუწყობს;

ე) არ გაანადგუროს საკითხის შესწავლისთვის მნიშვნელოვანი დოკუმენტაცია და მტკიცებულებები;

ვ) არ გაამჟღავნოს ინფორმაცია თანამშრომლობის პროგრამაში მონაწილეობის თაობაზე.

თანამშრომლობის პროგრამით გათვალისწინებული შეღავათები

თანამშრომლობის პროგრამა ითვალისწინებს შემდეგი სახის შეღავათებს:

ა) პირველი კატეგორია – ჯარიმისგან 50%-დან 100%-მდე ოდენობით გათავისუფლება;

ბ) მეორე კატეგორია – ჯარიმისგან 20%-დან 50%-მდე ოდენობით გათავისუფლება;

გ) მესამე კატეგორია – ჯარიმისგან 20%-მდე ოდენობით გათავისუფლება.