“საბითუმო ენერგეტიკული ბაზრის მთლიანობისა და გამჭვირვალობის შესახებ” (REMIT) ევროპარლამენტისა და საბჭოს №1227/2011 (EC) რეგულაციის მიმოხილვა

ენერგეტიკული გაერთიანების მინისტრთა საბჭოს №D/2018/10/MC-EnC გადაწყვეტილებით, საქართველოს, როგორც ენერგეტიკული გაერთიანების ხელშემკვრელ მხარეს, დაევალა ადაპტირებული სახით დამტკიცებული “საბითუმო ენერგეტიკული ბაზრის მთლიანობისა და გამჭვირვალობის შესახებ” (REMIT) ევროპარლამენტისა და საბჭოს №1227/2011 (EC) რეგულაციის მოთხოვნებისა და პრინციპების ტრანსპოზიცია და დანერგვა.

ადაპტირებული REMIT რეგულაცია ენერგეტიკული გაერთიანების ხელშემკვრელ მხარეებში განსაზღვრავს ელექტროენერგიისა და ბუნებრივი გაზის საბითუმო ბაზრებზე საქმიანობის საერთო წესებს. ეს წესები ადგენს საერთო ევროპულ ჩარჩოს ევროკავშირისა და ენერგეტიკულ თანამეგობრობის წევრ ქვეყნებში საბითუმო ბაზრის შემდეგ საკითხებზე:

• შიდა ინფორმაციის გამოყენებით ვაჭრობის აკრძალვა;
• შიდა ინფორმაციის გამოქვეყნების ვალდებულება;
• საბითუმო ენერგეტიკულ ბაზარზე მანიპულაციის ან მანიპულაციის მცდელობის აკრძალვა;
• საბითუმო ენერგეტიკული ბაზრის მონაწილის რეგისტრაციის ვალდებულება. 

ვის ეხება REMIT?

REMIT ეხება ნებისმიერ  ფიზიკურ ან იურიდიულ პირს, მათ შორის, „ენერგეტიკისა და წყალმომარაგების“ შესახებ საქართველოს კანონით განსაზღვრულ ყველა ენერგეტიკულ საწარმოს ან საბოლოო მომხმარებელს, რომელიც დებს გარიგებებს, მათ შორის, ათავსებს განაცხადებს ან/და სატენდერო წინადადებებს ერთ ან მეტ საბითუმო ენერგეტიკულ ბაზარზე ვაჭრობის მიზნით;