თუ თქვენი მიერთების მოთხოვნა წარმოადგენს ისეთ შემთხვევას, რომელზეც არ ვრცელდება გამანაწილებელ ქსელთან ახალი ობიექტის მიერთების საფასური, ასეთი სახის ობიექტის ელექტრომომარაგების სისტემის მოწყობა ან/და არსებულ ელექტროენერგიის გამანაწილებელ ქსელთან მიერთების მშენებლობა უნდა განხორციელდეს სისტემის ოპერატორსა და თქვენს შორის ურთიერთშეთანხმებით, ხოლო შეუთანხმებლობის შემთხვევაში თქვენ თავად (ან სხვა პირის მეშვეობით) უზრუნველყოფთ საჭირო საპროექტო და სამშენებლო-სამონტაჟო სამუშაოებს.

მიერთების პირობებზე შეუთანხმებლობის მიუხედავად, სისტემის ოპერატორი ვალდებულია, გამანაწილებელ ქსელთან მიერთების ტექნიკური პირობა უფასოდ გასცეს განაცხადის მიღებიდან 2 კვირის განმავლობაში. ტექნიკური პირობა უნდა გაიცეს ისეთი პირობით, რომ მისი შესრულება დაკავშირებული იყოს ყველაზე მცირე ხარჯებთან.

გაცემული ტექნიკური პირობის მოქმედების ვადაში (არანაკლებ ერთი წლის განმავლობაში) მისი ცალმხრივად შეცვლა დაუშვებელია. მიერთების ტექნიკური პირობა სხვა ინფორმაციასთან ერთად უნდა შეიცავდეს შემდეგ ინფორმაციას:

ა) მიერთების წერტილს;

ბ) მიერთების ძაბვის საფეხურს;

გ) მისაერთებელ სიმძლავრეს (პროექტის შესაბამისად).

იმ შემთხვევაში, თუ არ ეთანხმებით გამანაწილებელი სისტემის ოპერატორის მიერ გაცემულ ტექნიკურ პირობაში არსებულ მოთხოვნებს, თქვენ უფლებამოსილი ხართ მიმართოთ მარეგულირებელ კომისიას.

მიუხედავად იმისა, თუ ვინ ახორციელებს გამანაწილებელ ქსელთან მიერთების სამუშაოს, აღრიცხვის კვანძის მოწყობის სამუშაოების შესრულება უნდა უზრუნველყოს  სისტემის ოპერატორმა შესაბამისი განაცხადით მომართვის შემდეგ.